صالة السفر

من كتر ما الحزن بقى ف دمنا و أكلنا و شربنا , حتى ف غونانا و السهر

بقت بتتساوى الحاجات , صالة الوصول تشبه تمام صالة السفر

بنادي عالقبح نقوله يا عسل يا سكر انت يا قمر

و الموت بقى مجرد خبر

تصدق , ساعات بخاف لو قلبي دق , مانا كنت قربت خلاص اقول عليه حتة حجر

عارف , رغم احتياجي للفرح لكني بتلخبط قوي لو دق بابي بدون سبب و بدون شروط

ابقي نفسي اعيش كمان مليون سنة و اقول ياريت دلوقتي اموت

معقول بقيت بخاف كمان من الفرح و م الأمل و من الهدوء

و اقلق و اقول يا هل ترى اية مستخبي و اية اللي جاي بعد السكوت

عارف , لو كل الحاجات الحلوة كان مسموح بيها و تقدر تفوت

لو كان حقيقي دة وطن مش مجرد مساحة على الخريطة و ناس و زحمة و شوية بيوت

عمري ما كنت يوم اخاف م الفرح لو دق بابي

long life arab republic of egypt

مش عارف إيه اللي خلاني اتحمق و اكتب الموضوع دة يمكن هية مسألة مبدأ , أو جايز انا طلعت بحب مصر !!! الموضوع باختصار ان في احدى مدارس اللغات الخاصة بالاسكندرية اصدر المدير قرارا غريبا ينص على ان يؤدي الطلاب تحية العلم باللغة الانجليزية بدلا من العربية ! يعني بدلا من ان يقول الطلاب "تحيا جمهورية مصر العربية" يقولون "لونج لايف اراب ريبابليك اوف ايجيبت " والله الموضوع دة بجد , و اللي قاللي عليه اخويا اللي هو طالب في المدرسة دي " و انا كمان بالمناسبة كنت طالب فيها " , لا اعرف سبب اتخاذ هذا القرار الغريب الذي ينم عن جهل شديد بأبسط القواعد و الأسس و هل هو قرار المدير وحده ؟ أم بأيعاز من أحد ؟ و من هو هذا الذي يأمر مديرا لمدرسة مصرية جميع طلابها من المصريون هذا الأمر الغريب ؟ الأرجح أنه محاولة للإنفصال عن الكيان المصري و مدارس الحكومة "البلدي" اللي بيقولوا تحية العلم بالعربي ياي !! اخويا سألني و قاللي" اعمل اية ؟ اصل صحابي اتفقوا ما يقولوش حاجة خالص وقت تحية العلم فرحت ان العيال "مع الاعتذار لأخويا" اللي في ثانية ثانوي فاهمين ان ده غلط و قلتلوا " لا قولوا التحية بالعربي و محدش حايقدر يعملكوا حاجة انما ماتقولوش خالص لأ " المهم بعديها بسأله " ها عملتوا اية ؟" قاللي "في حبة قالوا بالعربي و حبة سكتوا و كتييييير قالوا بالانجليزي !!!" قلتلوا " ليه كدة ؟" قاللى " اصل دة طلع قرار علي كل مدارس اللغات " قلتلوا " و انت قلت بأنهي لغة ؟ ولا ما قولتش خالص ؟" قاللي " يابني انا ما روحتش اصلا الكلام دة هو و حكاية ان القرار طلع على كل مدارس اللغات عرفتو من الدرس , انا كان امتحان كيمياء في الدرس يابا , انا فاضي اروح احيي العلم بالهندي حتى "!!! ء