لما كنت

لما كنت شاعر كان كل الغنا حزين

و لما بقيت عصفور كتروا الصيادين

و يوم ما قابلت قلبي ما عرفش انا ابقى مين

طب اعمل اية .. اية

لما كنت حلو ما كنش عندي كاميرا

و قلت قشطة يا ابيض حبتني واحدة سمرة

و كل ما انوي افوق بترخص الخمرة

طب اعمل اية.. اية

لما كنت اسد ما كنش فيه غابة

و لما بقيت مفتري مبقاش في ناس غلابة

و على ما اكتشفت النبلة كانوا اخترعوا الدبابة

طب اعمل اية .. اية

على ما افتكرت اني حر كان كل البلد عساكر امن

و قلت اعمل كحك العيد لا لقيت دقيق و لا سمن

و لما بطلت احب حبيبي رق و حن

طب اعمل اية .. اية

لما كنت قط ماكنش في فيران

و لما كنت حرامي كان كل البلد جدعان

و على ما افتكرت اني مصري

كان بقى اللي كان

و انا اعمل اية ... اية